Acting president delivered a message on 46th anniversary of People’s Liberation Army.

RPF ki Acting President MM Ngouba na PLA gee 46 suba Mapok Kumwon ga Mari Leinana Manipur gi Meeyamda Piba Paojel.

Imaleibak amasung Meeyam ningtamnabagi lanjangda thawai katkhraba athoubasinggi mafamda kok nonduna yawolgi ikai khumnaba utchari.

46 suba Meeyamgi Ningtam Lanmee (PLA) gi yaifaraba mapok kumwon numit asida Ningtam Lanmee marupsing, eramdamgi yawolloi marupsing amasung ereichasing pumnamakki mafamda ikai khumnajabaga loinana yawolgi paojel asi thamjari.

Bharat eikhoigi anouba yeknaba natte. WESEA lamdamda maruoina Assam amasung Manipurgi oinadi masagi ningtamba amasung khunnai punsirol ga sagonnariba lichatsingda British loilam laktringei mamangdagi houna Bharat lomdagi temsingnaduna lakkhrabani. British ki loilam leingak youraklaba matungdagidi eikhoigi leibak khunnaida chattharakliba meeot meenei da systematic amasung institutionalized oirakkhibani.

Eikhoigi yeknaba Bharat maning makha tamba “democracy” chatpa leibak amani haijei. Adubu “democracy” chatpa maning tamlaba Bharat ta meeyamna asuk yamna meeot meenei nangliba awa meisa khanglibasi karigino? Wahang asi ngasi ngarangtagi natte, meeoi khujok kharana hangbasu natte. Matam kuinadagi kanglup kaya, makhal makha kayagi meeyamna leptana hangduna lakliba wahangni.

Tha tarataruk mapung fajinkhre Bharat leingakna Manipur gi meeyambu khutnek lanmee sijinnaduna terrorise touduna thamlibasi. Loilam leingakki thoujal amasung yaka ngaiduna leiba meeoi khara leibasinasu leibak meeyamgi fivamsi amukka henna sokchinhalle. Pambei leijadraba meeyamdi “khangenfam youre” haina laori. Fivam asi yourakpagi maram khangdaba meeyam ngasi leiramlaroi. Hanjinna amuk pallabada Manipur, 1947 gi August 14 da “Firal” chingkhattuna ningtamle laothokkhraba leibak amani. Bharatta namduna tinsinkhibagi wathok oiriba “Merger Agreement” law gi mityengda chatnaba yaba natte haina hiram asida khang heirabasing amasung meeyamna warep kaya loukhre. International law gi mityengda Manipur Bharatki khutlai paiba lanmeesingna occupy touraga loi leingakki khutthangda meeyambu namthaduna thamliba leibakni. Masana masagi maraibak lepchanabagi panggal louthokpikhrabana meeyamgi mathakta heitharakliba awafamsing asi yajaba nattana ngakthokchanabagi atei lambel leihandabani.

Lisang sitna changsillakliba lanjangsida mayek sengna chongthoklakliba wafam amana Bharat leingak mapukchel sengde thajaningai oide amasung aranba toubasing kupkhatpada makhoi masel chap manei haibasini. Manipur gi leimaida Meeyamgi Ningtam Lanmee (PLA) na khongdaba hourakngeidagi houraga Imaleibak amasung Meeyam ningtamnabagidamak meeoi kayana thawaina pontha pikhre. Lanjang asigi manungda loilam leingak amasung makhoigi khutlai paiba lanmee singna meeoi lising amaga chamanga romgi thawai matpikhre amasung kaya amabuna mafam khangdana manghanbikhre. Thengkhang kayarakta lupsing amadi meeoi kayana achumba wayel ama fanghannaba hotnaduna lakkhi adubu Bharat leingakna thawoi usittaba mawong utpa nattana asengba paokhum amatta pidri.

Atoppa khudam amaga loukhatlabada Nagaland gi Mon District ki Oting haiba mafamduda 2021 gi December da thokkhiba “Oting Massacre” hainasu khangnaba meehat adugi matangni. Koila thokfam da thabak sujaba sinmee singna mayumda hallakpagi lambida mayang lanmee gi 21 Para Special Force na ambush touduna meeoi taruk kaptuna hatkhi. Thoudok aduda khoisaonaraba Naga meeyamna protest toubada amukkasu meecham taret amasu nongmeina kaptuna hatkhi. Leibak meeyamgi akanba khollao ama lakkhibaga loinana Nagaland government na thoudok adugi maramda thijinnaba Special Investigation Team (SIT) ama semkhi. Mayang lanmeesingnasu masana thijillaga maral leibasing achan-meerai naidana thabak loukhatkani haina laothokkhi. SIT na Mayang lanmee unit amagi meeoi kunthra meehat aduda chennei haiduna Mon District ki Session Court amada 2022 gi May da charge sheet ama thanggatkhi. Adum oinamak loilam mapuna meehatpada chennare hairiba meeoising adugi mathakta wayel chatthanabagi ayaba pirakkhide. Naga meeyamgi achumba wayel fangnaba akanba khollao na maram oiduna Nagaland government na 2024 gi April 16 ta ayiba oina Bharat ki Supreme Court ta thanggatkhi. Supreme Court na July 15 da taraba matungda Union gi Home amasung Defence Minister singda notice ama issue touraga loisinkhi. Bharat leingakki meehat meepun gi thouwong asi Manipur, Nagaland amasung Assam khaktada thokpa natte, loilam leingakki mayokta lepliba WESEA lamdam gi meeyamna punna thengnariba laibakni. Lamdamsigi meeyamna maning makha tamnaba lanjang changsinnarakpa houkhibadagi Bharat loilam leingakna meeyamgi mathakta meeot meenei, meefa meepun, amadi tamthiba meehatki cheitheng ama piba leptri. Loilam leingakki khutlai paiba lanmee singna chatthariba meeot meenei, meehat meepunsing asigi achumba wayel fanghanbibagi mahutta chennaribasingdu kankhatpa aduga meeyamgi machin mensinnaba hotnabada loilam leingak, makhoigi khutlai paiba lanmee, wayel loisang pumnamak amatta oi, mannei haibasi kakpa yadraba wafamni.

Bharat leingak amasung lamlou lanmee singgi meehat meepun gi history asiga chap mannana namthak amasung pukchel sengdabagi history amasu leiri. Yawollupsinggi marakta lup kharana khutlaigi muknaba leptuna table da waroisin ama puraknaba hotnaduna lakkhiba chahi masing yamlakle. Adubu Bharat leingakna waroisin gi mahutta Framework Agreement, Suspension of Operations, Home Coming Ceremony, Ceasefire Agreement haina maming thonba lang kaya thaktuna lupsing asibu amadi meeyambu namthak touduna thambiri.

Bharat ki ningtambadi mamingtagi oiba ningtambani. British na chatlamba loilam sandokpa lam karambagi wakhallon thadoktri, ahoinadum manung mapan naidana safu kanna induna chatli. Sanglaba chahi 70 henna ningtamle haijariba Bharat leibakki leingak pathap, wayel kanglon dagi houna kanglup khaiba khunnai lichat sing asida ahongba amatta leitri. Ngasigi Bharat yumfam yaodaba leibakni haibasi tasenglaba wafamni. British na lousinlaga thamlamba colony gi luhup sinnarambani. Akaknaba laining amakhak chatpa amasung lon lonba kanglup amana atoppa kanglup, furup apikpa leibaksinggi hak munbiraga, fajin punsinduna semba leibakni. Bharat masagi meeyamna Bharat ki ningtambasidi “huranba kangbu amadagi atoppa huranba kangbu amada” sakti sinnarambani haijei.

British ki loilam leingak hek loikhibaga makhoina chattharamba lamlou lan Bharat na mahut sinduna chattharakkhibadu houjik faoba leppa leite. Achouba Bharat amagi manglanda maning makha tamna leijaramba leibak kaya namduna lousinkhibata nattana yumlonnariba leibaksingdagi lam khopchinba, yaragana lousinba yadragana Bharatki yaka ingadaba client state amagi fivamda thamba asigumba lamlou lanlongsing kaya chatthakhre. Nepal dagi waikhiba lam houjikfaoba pithoktri, Sikkim Bharatna yotsinkhre, Bhutan mamingtagi oiba Bharatki laothoktaba state amagi fivamda thambire.

Aranba thabakki afaba mahei leite. Bharatki lamlou lan asi khangba ngamdraba meeyamna ngasidi mafam khudingda makhoigi achumba khollao ga loinana Bharatki mayokta leplare. Nepal gi meeyamna Bharatna lousinkhiba lam handokpiro haibagi khollao kankhatlakli. Maldives ki meeyamna Bharatki khabei khara saba policy yaba ngamloi utkhre. Bhutan na masagi leibakki thoudang pangthokpada masagi right sijinnabagi mami tahannaba hotnarakli. Yumlonnaba leibaksinggi mathakta chatthariba Bharatki lamlou lan gi mayokta hourakliba meeyamgi ehou asi nongma nongmagi mayek sengba amasung safu kanba hengatlakli. Houjik thokliba Bangladesh ki wathok asi meeyamgi ehou asigi khwaidagi mayek laraba khudam amani. Bharatki loilam wakhallon amasung mapu sajaningbagi lichatta khwaidagi chaona maithiba nangba matang ama handakki wathok asina oiri.

Bharat leingakna Awami League ta mateng panglibasi anouba natte Bangladesh ning tamdringei East-Pakistan oiringeidagini. Houjik oiriba fivam asidi Sheikh Hasina gi imung manung amasung Awami League ki khutthangda Bangladesh pu Bharatki client State ama onthoknaba hotnarakpada oikhibani. Chahi taramanga muk leingak paikhibasi Bharat ki matengna namduna paihankhibani haibasi arotpa natte. Matam kharagi mamang Bangladesh ki aroiba election gi mangoinana matamdugi Awami League ki General Secretary na Bharatta lakpa matamda Awami League ki government Bharatki matengna hingba ngamlibani haina haikhi. Mahakna haikhiba wafam aduna maram oiduna matamduda Bangladesh ta achouba wathok ama oikhi. “Awang Nongpok Lamdam” gi “lalhoubasing” namthaba amasung “ka henba Islam niti chatpasing” thengnabagi mingda Bangladesh ki district singda Bharat ki spy agency sing fongna leihankhi amasung makhoigi matengga loinana police state amagi mawongda leingak chatthaba hourakkhi. Opposition da leiramba party gi meeoising jail da thamjinba, faraga lonna hattokpa, meereibakta thadokkhiba asinachingba kaya paktaknana touduna Sheikh Hasina gi mayokta leiramba pumnamak thupchinkhi. Mamanggi election da Awami League na opposition yaodaba election ama namduna pangthokkhi amasung madugi matungda chap chaba dictator ama oina leingak panba hourakkhi. Sheikh Hasina gi dictatorship yaningdaba amasung Bharatki ka henba mawong matou aduda pendabana maram oiduna maheiroisinggi ehou adu dictatorship muthatpagi ehouda ollakkhi. Ehou kansillakpaga loinana Sheikh Hasina na dictatorship ki hounabi force amasung violence sijinnabada henna thajaba thamkhi amasung maduna maram oiduna numit kharanigi manungda meecham amasung maheiroi cha kayagi punsi mangkhi. Bangladesh ki ningtam lan matungda amukta thoktriba yamlaba meesi meena adu ubada meeyam tuminna leiba ngamkhide amasung pumnamak yaosillaktuna ehou kansillakkhi. Ehou laksinnaba Sheikh Hasina na lanmee sijinnarakkhi adubu Bangladesh lanmee na maheiroi amadi meeyamda nongmei kappa ngamloi haiba firep lourakpaduna Sheikh Hasina gi laibak lepkhi.

Sheikh Hasina na Bharatpu pelhannaba hotnakhibasinggi manungda 28 July 2016 da Bharat ka extradition toubada yanaba asisu amani. Yanaba asigi matung inna “Awang Nongpok” ki yawollup ki luchingbasing yaona meeoi kaya faraba matungda Bharatta pithokkhi. Yanaba asigi matung inna Sheikh Hasina bu pithorakkadabani haina Bangladesh meeyamgi maikeidagi thamba hourakkhi. Bangladesh ta fongba maming leiraba pao-che amagi “Bharat ki Rahu dagi Nanthoklaba Bangladesh” haina mingthonba article amada Modi pelhannaba “Manipur gi freedom fightersing” faoba pithokkhibani maram aduna Sheikh Hasina Bangladesh ta karigi pirakloidabano haina hangli.

Bangladesh amasung masigi meeyamgi apamba ikai khumnabagi mahutta Bharatki hounabi thouwong makha chattharakkhi amasung thouwongsing aduna Bharatna kari pammi amasung kari touge khalli haibadu lotlambadagi afongba oirakkhi. Sheikh Hasina hek chenkhibaga makhong leibak tadringeidagi Bharatki apamba maikei kaya thokna sandokpa hourakkhi. Bangladesh ngamkheida khut thoknarakpa yabagi akiba faohanba wa pao sandokpana ihan hanba khongthang oikhi. Matungda Bangladesh meeyam gi ehou adu lanna uhannaba “foreign gi khut” ki matangda wafam kaya sandokpa hourakkhi. Bangladesh na China ga henna naksinnanaba hotnaraklabadi Bharatki “Chicken Neck” corridor asi pakthokkadabani aduga Chittagong Hill Tracts ta amuk hanna lan houhan-gadabani nattragana Bharatki “North-East” ta tinsin-gadabani haiba wafamsing asi maikei kayadagi puthokhanlakkhi. Masigi mathakta maikei amadana 1971 gi lan Pakistan maithiba matamduda Bangladesh asi Bharatna lousinlamgadabani madu touramlabadi houjik thokliba wathoksing asi amatta thoklamloi haina ikaiba khangdabamakhei puthorakli. Bangladesh pu kihanbagi khwaidagi anouba khongthangda Bharat ki Defense Minister na Bangladesh ki houjik oiriba fivamsi yenglaga lan gidamak sem sanaba haikhre.

Bharat ki mayokta wa ngangba matamda meeoising aduna Bharatki interest ta akaiba thokhalle haiduna nganglibasing adu thingnaba nattraga makhoigi mathakta thabak loukhatnaba yumbu oiriba leibaksinggi mathakta mawong kaya thokna taksilli. Masigi mathakta meeoising aduna sijinnaba platform singda makhal makha kayagi pressure pibadagi hendoktuna karigumba platform kharadi cheirak oina thingjinba nattraga sel konghanba asinachingbasu touraga lak-i. Sheikh Hasina leingak hek tukhibaga Bharat ki media gi khutthangda Bangladesh ki interest ka henna sokpa wafam kaya ama ngangkhre sandokkhre. Wafamsing asi icham chamba meeoisingna haiba natte. Bharatna masagi interest sokpa matangda atoppada touhanningba touhanningdabasing adu masagi meeoisingna atoppasu nattaba yumthangnariba leibaksinggi mathakta touba yahallibasi Bharat leingakki ayaba amaga loinana pangthokpa thabakni haibadu fongdokli. Bharat lam karamba khundaminnariba kanglup furupsing gi ikaikhumnaba machet amafaoba ngakningbagi apamba leitaba loilam lichat thadokpa ngamdraba leibak amani haibasi makhoina piriba narrative sing asina yamna sengna takli.

Bharat ki manung amasung mapanda thokliba thoudoksing asi oirakkani thajadaba nattraga marak marakta yamna tangna thokpa thoudou natte. Bharatki settok khaidokpa ngamdraba amotpa wakhallon ama induna leiba maramna tangkak naina thokcharakpani. Asigumba kangbu asidagi eikhoigi meeyamna haija nonjaraga achumba wayel fanggani amadi awa potlumsing asidagi kokpigani haina khallabadi yamna langani. Madugi onna teinabada awa potlum hengatlaktuna hougat kangkhatpa ngamdabagi fivam lakpa yai haibadu ngasi Imaleibak Manipur da thokliba fivam asimakna utli. Matou asi khangna khangna meeyamna loi leingak mapu amasung lamlou lanmeesingda thoudoksing wakheibinaba haijaba tarabadi “Yongda tal yenbinaba haijaba” ga pangkhak oigani. Awabadi, thoudou asimak houjik houjik Manipurgi meeyamna mayoknari. Bharatki fiban manungda makhoigi loilam leingaktagi achumba wayel fanggani haina thajaba thamlimakheidi lamdamsida leiriba meeyam amasung furupsinggi interest ta henna kaitharakpa amasung sokchillakpa nattaba atei mahei leiroi.

Loisinlakpada haijaningbadi meekha ponduna leirimakheidi Imaleibak amasung Meeyamgi punsida henna tamthiba cheithengsing fangkhigani haina RPF amasung lamdamsigi yawollupsingna tattana cheksinwa haiduna lakkhi. Ngasisu wafam asi adumak haikhigani maramdi Bharat lam khaktamak karamba lamdamsigi meeyamgi nungai yafanabagi wakhal machet amafaoba leitaba loilam lichat thadokpa ngamdraba leibakni. Ngasigi leithokpa yadraba tanfam asida leibak meeyam ningtamnabagi yawol meira asi puminnaduna manglomda changsinminnarasi haina nollukna paojeljari.

LONG LIVE RPF

VICTORY TO PLA

Meeyamgi,

MM. Ngouba

Acting President, RPF

Date: 25 September 2024